सोलापूर : शैक्षणिक वर्ष २०१७-१८मध्ये प्रथम वर्ष अभियांत्रिकी पदवी अभ्यासक्रमाला प्रवेश घेऊ इच्छिणाऱ्या विद्यार्थ्यांकरिता १९ ते २० जुलैपर्यंत सुविधा केंद्रावर नोंदणी करण्यासाठी विशेष फेरी जाहीर करण्यात आली आहे.
ज्या विद्यार्थ्यांनी नोंदणी केली नसेल, अशा विद्यार्थ्यांना आपली नोंदणी नव्याने करण्याची संधी उपलब्ध झाली आहे. या फेरीमध्ये नोंदणी केलेल्या विद्यार्थ्यांना केंद्रिभूत प्रवेश पद्धतीद्वारे प्रवेश दिला जाणार आहे. या फेरीची स्वतंत्र गुणवत्ता यादी २० जुलै रोजी सायंकाळी आठ वाजता तंत्रशिक्षण संचालनालयाच्या वेबसाइटवर प्रसिध्द होणार आहे. या यादीतील नोंदणी झालेल्या विद्यार्थ्यांना ऑनलाइन ऑप्शन फार्म २२ जुलैपर्यंत भरावयाचे आहेत.
त्याचप्रमाणे शैक्षणिक वर्ष २०१७-१८मध्ये थेट द्वितीय वर्ष अभियांत्रिकी पदवी अभ्यासक्रमाला प्रवेश घेऊ इच्छिणाऱ्या विद्यार्थ्यांकरिता सुविधा केंद्रावर नोंदणी करण्यासाठी २३ जुलैपर्यंत मुदतवाढ करण्यात आली आहे.
‘या फेरीद्वारे प्रवेश घेणाऱ्या विद्यार्थ्यांना सरकारच्या सर्व मागासवर्गीय जातीच्या शिष्यवृत्त्या, ईबीसी सवलत मिळणार आहे. या सुवर्णसंधीचा लाभ विद्यार्थ्यांनी घ्यावा, तसेच ज्या विद्यार्थ्यांनी नोंदणी केलेली नसेल अशा विद्यार्थ्यांनी आपली नोंदणी सुविधा केंद्रावर जाऊन कन्फर्म करून घ्यावी. सुविधा केंद्र रविवारीही सुरू राहील,’ असे आवाहन एन. के. ऑर्किड अभियांत्रिकी महाविद्यालयाचे प्राचार्य डॉ. जे. बी. दफेदार यांनी केले आहे.
